2021年9月10日 星期五

交樓延期/雜談

 上次提到買左個樓花計劃用來自住,原本預計年尾交樓,但早2日收到通知因為不可抗力因素而要延遲4個月。上網睇發現原來今年都幾多樓花需要延期,不知是否疫情因素拖累。好在唔係等樓住加上供完樓後每月依然有足夠正現金流,但如果有d人一邊供一邊租樓等新樓入伙,可能會大失預算。現時都無咩可以做,唯有等。


個人股票組合方面,上半年表現雖為正數但依然不盡人意,工作忙,加上Q2的版塊輪動相當消磨意志,再加上組合少左球幾錢放了在樓花上,管理組合的鬥志大減。今年最受傷不用講是港股互聯網,另外reopening失敗亦導致舊經濟比較多的PSH表現不濟。最近對組合進行大執,清左好多雞肋買番一些SaaS,表現有番點起色,鬥志亦有點回歸。


工作方面今年比較煩的是公司去年在香港及另一個office各請了1個新仔,我都有份要幫佢地去幫大家 (help them help us),暫時都不盡人意。我都明批評d junior一蟹不如一蟹十足十廢老一樣,但其實2位新人都唔係細我好多,都係分別細1、2年。但做我這個行業有樣野好重要係識獨立工作,要識自己搵野做同諗下點樣build up自己,可能係教育制度問題,2位人兄都係唔係好清楚點樣自己take initiative去做野,都係人地叫先去做,暫時來講都係無解。

2021年9月4日 星期六

碳排放權ETF

無update一段時間,自己在大約1個多月前買入了KRBN,一隻追蹤所謂碳價的ETF。


所謂碳價係講緊碳排放權交易裡的碳價,KRBN超過7成是追蹤歐盟的碳排放權交易,接近2成是追蹤美國加州的碳排放權價格。歐盟現時是碳排放權交易最大巿場,而剛剛2個月前中國亦開始碳排放交易。


所謂碳排放權交易是現時好多國家包括中國在內都有一個所謂碳達峰及碳中和的目標,所以都會對國內的企業設立碳排放限制。一間公司想擴展好難唔會有額外的碳足跡,如果該公司的碳排放用盡,可以向其他有剩的公司購買,由此形成一個交易巿場。全球各國如果想達到政策目標,碳排放的intensity一定係越收越緊,碳排放權的需求大概率係長期會不停上升。IHS Markit估計碳排放權的價格要升到上每噸147美元才有機會守住全球氣溫上升在1.5度以內。個人認為呢幾年天災越來越多,而且一定程度上歸咎於全球暖化,各國政府對碳排放的限制只會緊不會鬆,特別係中國突左個頭出來要帶領碳中和以提升國際上的地位。


自己差不多從來唔掂商品,黃金ETF可能7-8年前買過一轉,自己都係傾向於真係做實業解決實質問題的公司 (新能源的話例如Tesla)。但個人認為碳中和這個trend實在太大,碳排放權亦不失為一個跟股巿相關性較低的選擇。

2021年7月24日 星期六

補習行業玩完

話說最近極忙,所以個人組合update由每月推到變每季算,亦唔係每月有野講,組合繼續行番今年買巨型GARP股的策略。


星期五下午傳出內地教培整治政策正式落地,直接將新東方及美巿的好未來股價一日內大跌50-70%,政策出手之重非常誇張,開頭都有懷疑過係唔係流料,以前都試過有假文件流傳。大家睇住個50-70%的數字都不禁講笑個跌幅係YTD,不過唔係year-to-date,係yesterday咁解。


結果昨日就正式宣佈政策落地,學科教培要轉非營利性機構而且完全不能上巿,比起大家開頭估最差都係只禁K-9假期及週末補課的情況更差。新東方及好未來執笠就唔會,但要轉型做非學科教培,學科教培操大家考試而且有課程跟,標準化程度高且可大規模複製,同工廠無咩分別。非學科教培,藝術、體育這種無咩標準可言,教師人才供給又係個問題,營利性相信同學科教培差天共地,2巨頭就算生存到落去已經不再是本來的新東方 好未來。


自己雖無持有教育股都不禁有點唏噓,自已讀大學果陣已投過好未來,果陣教培行業集合: 高增長、強現金流、低週期性、強定價能力,堪稱完美,現在整個行業唔見左。


事件背後更大的盤算應是內地想減輕大家的負擔,然後提高出生率,從地產到教培到互聯網公司唔再無限加班996 007,都係一樣。最直接影響相信會係人工成本上漲更快,經濟利益的分配會由資本分多d到人力上。自己組合中比較exposed的應是美團及藥明,美團不用講,藥明都算勞動密集,但公司有沒有996 007就不得而知。比較好的是藥明利潤率相對高,而且2間都ramp up緊資本密集而不是勞動密集的CDMO業務,有一定buffer應對。


自己現在無持有但影響可能大的是物管,物管極度勞動力密集,而且好多公司會將一部份人力外判,果班人好多都無交社保,隨時好似美團咁收緊一棍打落來。物管唔似CRO,利潤率好低,人力成本上漲造成的delta會好大,而比美團更攞命的是美團有一定能力pass on部份成本比消費者及商家,物管一直面臨提價難的問題,有無能力將呢樣野pass on會係行業好關鍵一點。

2021年6月5日 星期六

2021年 5月個人組合小結

                      5月        年初至今      

組合            -2.4%      +0.9%       
SPY US       +0.7%      +12.7%     
盈富            +2.2%      +7.8%        
ACWI US    +1.5%      +11.0%       
(ETF表現用Bloomberg提供的總回報,是假設了股息再投資,並不代表個人投資者的真實回報)

5月市場無咩變動,但科技股續弱。組合最受傷的是業績麻麻的Softbank、ARKK及ARKG。


組合十大長倉持股
                               比重         
藥明康德/生物          11.8% 
Pershing Square      10.2% 
PayPal/Mastercard 5.3%
騰訊/Prosus             5.2%
Scottish Mortgage Trust 5.2%
Microsoft                 5.1%
美團                        4.9%
Nvidia                     3.4%
ARKK                     3.2%
Softbank                  2.9%


組合持有30股票 
淨倉位 (長-短-現金) 為88%。


5月淨賣出,清倉了TDOC及MELI,買入了INFL。

個人認為高增長股需要時間消化,好多今年都唔會有運行,現時通脹上升的風險遠大於無增長股而miss了升幅。組合現時都慢慢再平衡,但再平衡唔係話1日就搞掂,前提係要有轉移的目標,呢一刻先來買旅遊相關我有點懷疑。
而且增長股唔掂都唔係全部唔掂,例如NVDA其實仲係好強,所以亦唔係話一口氣就轉曬,要睇清楚咩係應該沽而咩係值得轉。

今個週末睇左d礦業股,好多礦產都係政治唔太穩定或者政府好窮隨時會打劫你間公司的國家,例如秘魯現時的總統候選人之一就話要學鄰國智利咁大幅加銅企稅從3成加至7成,香港上巿的五礦資源食到應一應。紫金都有段時間在巴布亞新磯內亞有個金礦在2019年到期後比政府關停,傾左一段時間去年終於係出讓部份權益給政府後先開番。如是者有個問題就係礦業股其實唔太穩陣,但當果d地方政局不穩時,又會造成供應緊張。呢個問題似乎無解,可能要直接買商品ETF而不是礦業股。另外,銀行可能係比較折衷的選擇,通脹升做成利率上漲壓力而銀行受惠,係無商品咁直接但勝在安全,個人認為加拿大的銀行值搏率可能更高。


2021年6月4日 星期五

PSTH令人失望但有後著

Pershing Square Tontine昨天傳出打算買入法國傳媒巨頭Vivendi旗下的Universal Music (UMG)10%股權,作價相當於420億美元的enterprise value,而騰訊亦持有UMG 20%股權。PSTH昨晚大跌,其中一個原因可能係PSTH本身價錢較高,好多未有deal的SPAC已經去番原本價甚至更低,而PSTH一直有溢價,其實跌完都仲有溢價,另外亦可能係UMG令人失望。


UMG絕對係一間好公司,作為全球3大music labels(另外2間包括Sony及Warner),旗下版權歌手包括Taylor Swift、Kanye West、Lady Gaga等。個人持有Sony的股票,除了影像傳感器及Playstation外,個人認為Sony Music亦是集團其中最好的資產之一。好多人會擔心music streaming公司坐大會削弱3大music label影響力,因為music streaming令distribution呢步容易左好多,呢個長遠來說的確係。但其實streaming只係一個藝人收入的少部份,疫情前絕大部份來自演唱會,甚至將歌license比電視劇/電影賺得仲多過streaming。所以對藝人來說唔係淨係擺首歌上Spotify/Apple Music就可以賺錢,未來好長時間藝人都需要music label幫佢地全方位宣傳,發展佢地的事業先可以成功。


但呢單deal,如果成事,最大問題唔係UMG本身係唔係好公司,而係UMG對股票投資人來說唔係一件好特別的資產。首先,Warner Music (WMG)已經上巿,股價表現還過得去。但因為WMG的存在,UMG雖然更大但不是甚麼稀缺資產,而且本身買Vivendi差唔多已經係買左UMG。再者UMG一直打算今年夏天獨立上巿,而UMG亦講左即使最後賣10%比PSTH,最後仍會獨立上巿,所以PSTH係買左一件最後點都會上巿的非稀缺資產。


話雖如此,PSTH仍有後著,UMG 10%股權41億美金會有25億來自PSTH,16億來自Pershing Square,然後PSTH仍有15億美元現金在手去搵其他目標。而因為PSTH已經做左deal,技術上不再是一家SPAC,不會再有時間限制。另一方面,PSTH的股東會有一個rights去買另一家新的叫Pershing Square SPARC的股權,但呢隻SPARC的錢不是現在出,而是該SPARC搵到目標要做deal時才需要股東出錢,而Pershing Square亦commit左10億美金(up to 50億),如果所有PSTH股東都exercise這個rights,會有另外56億,即最多有106億火力去搵另一單deal。


總括而言,PSTH的UMG deal令人失望,但有後著,問題係PSTH原本40億搵deal都咁艱難,攞住106億可以搵到咩未上巿的巨無霸呢? 好在SPARC只係一個rights,唔洗大家坐住d錢係個SPAC到等,算係個無咩成本的option。