2021年7月24日 星期六

補習行業玩完

話說最近極忙,所以個人組合update由每月推到變每季算,亦唔係每月有野講,組合繼續行番今年買巨型GARP股的策略。


星期五下午傳出內地教培整治政策正式落地,直接將新東方及美巿的好未來股價一日內大跌50-70%,政策出手之重非常誇張,開頭都有懷疑過係唔係流料,以前都試過有假文件流傳。大家睇住個50-70%的數字都不禁講笑個跌幅係YTD,不過唔係year-to-date,係yesterday咁解。


結果昨日就正式宣佈政策落地,學科教培要轉非營利性機構而且完全不能上巿,比起大家開頭估最差都係只禁K-9假期及週末補課的情況更差。新東方及好未來執笠就唔會,但要轉型做非學科教培,學科教培操大家考試而且有課程跟,標準化程度高且可大規模複製,同工廠無咩分別。非學科教培,藝術、體育這種無咩標準可言,教師人才供給又係個問題,營利性相信同學科教培差天共地,2巨頭就算生存到落去已經不再是本來的新東方 好未來。


自己雖無持有教育股都不禁有點唏噓,自已讀大學果陣已投過好未來,果陣教培行業集合: 高增長、強現金流、低週期性、強定價能力,堪稱完美,現在整個行業唔見左。


事件背後更大的盤算應是內地想減輕大家的負擔,然後提高出生率,從地產到教培到互聯網公司唔再無限加班996 007,都係一樣。最直接影響相信會係人工成本上漲更快,經濟利益的分配會由資本分多d到人力上。自己組合中比較exposed的應是美團及藥明,美團不用講,藥明都算勞動密集,但公司有沒有996 007就不得而知。比較好的是藥明利潤率相對高,而且2間都ramp up緊資本密集而不是勞動密集的CDMO業務,有一定buffer應對。


自己現在無持有但影響可能大的是物管,物管極度勞動力密集,而且好多公司會將一部份人力外判,果班人好多都無交社保,隨時好似美團咁收緊一棍打落來。物管唔似CRO,利潤率好低,人力成本上漲造成的delta會好大,而比美團更攞命的是美團有一定能力pass on部份成本比消費者及商家,物管一直面臨提價難的問題,有無能力將呢樣野pass on會係行業好關鍵一點。

5 則留言:

  1. 個政策感覺就係夾硬黎。今日打補教行業,如果聽日改為內房、後日打內險全部轉為非營利機構咁個資本市場仲點運作。

    好在自己無教育股喺手,但都要提醒自己唔好忘記中概的政策風險呢。

    回覆刪除
    回覆
    1. 暫時睇主要係想減少大家負擔提高生育率,但問題係點樣減負呢樣野可以無限想像,會唔會禁止人打機呀、飲酒呀,咩都可以想像。

      刪除
  2. 好未來都曾經有過, 佢都有唔錯既技術, 估唔到咁樣死。

    回覆刪除
  3. 你好,我們是財經媒體秒投StockViva,提供財經KOL(例如金曹,古天后等等)港股、美股、外匯等投資分析、即時問股票討論及交流等。我們留意到你的Blog是講解有關投資股票的心得,而且十分詳盡。現時有個廣告合作計劃,希望可以跟你合作。如有興趣了解更多,我們會提供合作方案詳情給你,期待你的回覆!email: irene.li@moleculez.co

    回覆刪除