2021年5月29日 星期六

通脹與奢侈品股

通脹預期繼續升溫,新債王Jeffery Gundlach在早前的訪問亦提到通脹會係一大問題,他們(Doubleline)內部的模型估通脹會在7月份見頂,但萬一通脹繼續超預期,相信會對股巿有另一打擊。


其中一種抗通脹的股票一定係奢侈品股,因為pricing power強,好容易就可以pass on成本如人工、租金等上漲 (原材料則大部份公司都是佔極少,你懂的)。個人組合上月買入了Kering,其實自己2,3個月前就建議一位朋友買LVMH,但我上月才買的時候,LVMH估值已經不便宜,Hermes就更不用說了,所以選了Kering。Kering質地上不及Hermes及LVMH,主力品牌是Gucci,其次應是Saint Laurent及Bottega Veneta。Gucci對比LV、Dior始終有種fashion味較重的感覺,奢侈品屬性不及LVMH 2大頭牌,對比Hermes就更不用說了,無得比。所以買入Kering係有點將貨就價,但另一方面,通脹上升其實係因為經濟回復(至少係發達國家如此),所以都會受惠需求上升。


另一奢侈品巨頭是Richemont,個人麻麻地,主要是Richemont的品牌都是hard luxury,珠寶為主,頭牌如Cartier、VCA、IWC、Piaget等都是門檻相當高的奢侈品,成日見d女仔戴個四葉草頸鏈就是VCA最便宜的小飾物之一,好似都要萬幾蚊,當然提價好容易,但門檻太高的品牌其實銷量增長會比較慢。LVMH經常提到點去平衡desirability同accessibility,出太多產品,太濫則會破壞品牌力,太exclusive又好難有增長。LVMH是平衡兩者的高手,Richemont比較係前者,好exclusive,好難有銷量增長,Kering及港股的Prada比較似後者,比較accessible但品牌出事機會較大。 Prada對比歐洲更大股相當落後,但質地差太遠,主力2個品牌Prada及Miu Miu都在走下坡,老闆兼首席設計師Prada對公司控制太強,好難吸引及留住好的designer。


茅台係另一類型,自己不是酒的專家,但覺得茅台味道唔錯,果種香氣的確係呢種酒獨有。同好多鬼佬傾過,佢地都唔明茅台公司點可以值咁多錢,其實同理,信仰就係人人不同。但茅台有個問題係比阿爺控制,其實唔一定加到價,可能仲要幫手穩定價格。


這個星期聽了個1個鐘講Ethereum的podcast,自問對投資好學都聽到我一頭霧水,相反Bitcoin對大部份人的value proposition在簡單得多,就是有限的數量。自己仲研究緊crypto,最近幣巿似有回調,不排除會參與下。

2021年5月22日 星期六

參與樓巿

最近一段時間都好少搞股票上的事情,除左工作忙左,亦係因為買樓。睇左某幾個區一段時間,睇左好多次,最近終於上車,買了一個巿區的新樓一房單位。自己2019年初已開始睇樓,仲爭d買左,但果時未放寬按揭成數,計過條數好stretched,壓力都幾大,無房納米樓則從來不考慮,最後無上車。好好彩2019,2020年股票的回報都相當唔錯,而且升職加薪,現時買這個單位壓力細左好多。馬後炮講,果陣勉強買左樓的話,真係學黃國英話齋"一味夢想買樓,買唔到固然恨,買得到亦可能得個坐字,看着新經濟狂潮擦身而過,日後心理更加不平衡。"。但亦正正係上年年尾覺得新經濟狂潮狂得滯,故套現一部份買番d傳統野,無咩傳統得過直接買樓。


本身係睇同區的二手樓群,睇睇下覺得該新盤各方面都唔差,位置上好過曬周邊在budget內的樓盤,但比二手的溢價只係很小很小,而且好多朋友住該區都有不錯的評價。而該新盤其實賣左一段時間,今年年尾係關鍵日期,所以我最近買其實不用等太耐。缺點係該區依然不斷有不同的樓盤起緊及落成,巿區重建等等,應該有一段時間還會有建築地盤。


香港樓供應長期不足難解決的問題好多blogger都分享過,唔講了,最攞命係房屋供應有好多係比左公營房屋,我呢類唔合資格上公營房屋的其實好攞命。一房的大小不是長遠之計,但都算正常住到人,襯早一段時間樓巿有一定的積弱時上車,而且供這樓的壓力比較細,先對沖左自己的需求再算。


2021年5月14日 星期五

通脹ETF

 今年板塊輪動非常強,自己偏增長的投資組合都受到衝擊,年初至今回報可能在0%咁上下。通脹猛於虎,聯儲局以至巿場都認為通脹係短期現象,到大部份人開始復工復產就可以解決供應樽頸的問題。個人一向對宏觀無強烈看法,但一旦通脹真係超出預期,對巿場的打擊將會好大。月初提到自己已將一些SaaS股沽出,集中在GARP股上,而最近亦發現一隻今年1月才開波的ETF聲稱可以抗通脹,ticker是INFL,Horizon Kinetics Inflation Beneficiaries ETF。


通脹絕對是股票投資者的最大敵人之一,巴菲特1977年在Fortune寫了一篇文章"How Inflation Swindles the Equity Investor"有詳細解釋,但他同時寫道"stocks are probably still the best of all the poor alternatives in an era of inflation"。個人一直係投資股票,同以前trade過下外匯咁,對直接投資商品興趣不大,股票係公司,公司係生,商品係死物。一間well run的公司係有能力適應環境去令公司成長,商品基本上除非你食到正個勢,否則只能靠trade來trade去賺錢,個人唔太好trade來trade去,期貨每個月roll亦會有成本。


 INFL是一隻主動型股票ETF,是由Horizon Kinetics的基金經理主動選股而不是追蹤指數,同ARK一樣。主要投資於受惠通脹的公司,但同時那些公司不需要強勁的通脹才可提供滿意回報。簡單點來說,通脹最後無大升,那些公司都會繼續做得好,通脹來則會更受惠。佢地對投資商品的看法同我一樣,都係一個directional bet,要食得正個勢,如果高通脹無發生就企係度。


他們比較青睞的公司是輕資產,高資本回報率但同時對實物資產或商品有exposure的公司,包括royalty、交易所等。對於上游的E&P及礦企,他們認為這類企業都很重資產而且好重債,通脹大升一方面受惠收入端,但亦好可能影響成本端,另一方面如果高通脹無發生這類公司質地都比較差,不是長期持有的好對象。


個人組合剛剛這星期買入了INFL,我都擔心通脹。有人可能會問,驚通脹點解唔買金? 金抗通脹其實可能係可能唔係,黃金真正係同實質利率 (real rates,即名義利率減去通脹),real rates越低,黃金越會升,如果yield係跟得上通脹令real rates穩定的話,黃金其實無大升的潛力。黃金最好的情況應係通脹極速失控而央行政策完全追唔上令real rates大跌,呢個亦都係一個可能情況,我認為都可以小注去對沖。組合中有一小部份用來trade下無咩所謂,連主力部隊都trade來trade去則好大壓力,更不要說我對短線宏觀的睇法成日都錯,就算我有個view,我自己都唔信自己。作為投資組合的主力部隊,都希望係一些可以長揸的優質公司,INFL這種進可攻退可守的則相當適合。

2021年5月2日 星期日

2021年 4月個人組合小結

                     4月        年初至今      

組合            +5.2%      +2.8%       
SPY US       +5.3%      +12.0%     
盈富            +0.9%      +5.6%        
ACWI US    +4.3%      +9.3%       
(ETF表現用Bloomberg提供的總回報,是假設了股息再投資,並不代表個人投資者的真實回報)

4月市場反彈,個人認為純粹債息回落,但債息慢慢回升的趨勢應該不變,只係快慢問題。組合最受傷的是業績麻麻的Sony、Spotify及Teladoc。


組合十大長倉持股
                               比重         
藥明康德/生物          10.8% 
Pershing Square      10.4% 
PayPal/Mastercard 5.4%
騰訊/Prosus             5.4%
Scottish Mortgage Trust 5.3%
Microsoft                 5.2%
美團                        5.0%
Softbank                  3.5%
ARKK                     3.4%
Nvidia                     3.2%


組合持有31股票 
淨倉位 (長-短-現金) 為93%。


4月淨買入,大方向係沽出一些超高估值但並無特別受惠於經濟復甦的公司,例如SaaS包括Datadog、Snowflake、Square等。換入了所謂growth-at-a-resonable-price (GARP),增長無咁快但估值唔算超高而且一定程度上受惠經濟復甦的公司包括Alphabet、Facebook、Mastercard、Salesforce、Kering。另外買入了AGC,AGC是一家SPAC,已經宣佈會同東南亞外賣出行平台Grab做SPAC merger。

今年的大方向都應該係經濟復甦及通脹升溫,一定係對本身持有的高增長股極度不利,但個人對於商品類及強週期股差唔多無認識,無謂衝入去隨時比人收割。權宜之計就是上面提到某程度上受惠經甦但同時具長期前景而估值唔算離譜的GARP股。