瑞年停牌

早幾日睇新聞看見瑞年 (2010 HK)終於停牌，3年前Glaucus指佢造假，我讀完份報告已經確定玩完。今次特別講講這鬼股因為自己讀大學果時，叫做入左股場3，4年時曾經買過，開頭甚至打算做長線投資。

2010年正值外資回復對中國的興趣，消費品行業人人爭住買。當年睇瑞年，基本上有2樣野，中國Amino acid市場極細，普及率如追上歐日已經不得了。瑞年當年話有成20%以上市佔率，是行業龍頭。另外，長江生命科技是策略性股東，並派出Edmond Ip做非執董，不少大funds如GIC、Templeton都有入。Mark Mobius當年也是大讚瑞年，更話自己參觀過廠房及服食其產品。

當年年少無知，就咁簡單睇盤數覺得數字靚仔，連現金流也是強，加上個theme好似幾好就買來投資。2011年股價跌了無耐時買入，之後繼續跌。其後歐債危機打到來真係頂唔順要迫自己減risk，輸4成下清了倉。現在回看當然是執番身彩，加上學生哥無咩錢，其實輸了的錢只是好少。

之後都無再follow呢隻股票，因為2012至2015年一直trade緊4,5倍PE，太低PE的股票我反而有戒心。2013年已有內地blog質疑瑞年是造假的地雷股，但一直到2015年年中還有幾個報紙專欄以PE低為由推這隻股票，有時覺得每日都要寫d野出來交貨的寫手實在不易做。 

很多人事後回望會抽些所謂蛛絲馬跡假如派息率奇低等等去解釋為何瑞年是假，我認為公司有心要做假，一般人甚至機構投資者是很難發現。現在回望，我認為有樣野馬後炮可以看到的是要小心公司經常有資本開支過多，不同行業有不同的需要。做保健品有否需要連年起廠是一個問題，最大問題是起完廠沒有反映在營收增長上。但這些都只是事後解釋，當局者迷，當你企在那個時點上睇盤數可能會有疑問，但隨時會被管理層簡單解釋下就不再深究。另外，產品真不代表盤數真，可能產品是真實存在但其實收入只有很少。

總括來看我認為要知道一家公司有否造假是不可能的，隨非你好似同管理層有仇咁全職去調查，所以要靠控制注碼去管理風險。